聖誕心情...

今個星期過得很趕..四個working days中有兩日仲放早.. 又要趕deadline加埋年底closing.... 做冬..飯局.. 又未辨妥聖誕禮物.. 再加埋勁強烈嘅holiday mood.. 學阿蘇話齋..真係人都癲 !! 今晚仲走了幾場去撲禮物..排完隊等俾錢又再排隊等人包花紙..風塵撲撲一輪後..個人真係好似虛脫想散..救命呀....! 不過..一路以來..我始終最鍾意都係聖誕節..

Yes & No

初初聽軒仔這首歌時..感覺唔係太深亦唔係太入耳..直到有機會反覆去聽他的unplugged live cd..個mood又好似越來越到..近來都有點不知所措..但又想去整理一吓雜亂的思想同步伐..咁啱又聽到這首寫人心情有D laid-back,但又想尋找些答案嘅作品.. 人可不可以吻煙花..可不可以抱天下..還可以碰到了..就捉得到嗎..這一切..懷疑偏偏想去答 人可不可以更簡單..可不可以放得下..還可以嚮往了..就找得到嗎..走一趟..回來想想先再答 心會亂才會問..靈魂偏偏只會愛..How can I let you know how much I care..? ">

新傢俬

難得有兩天假期..偏又遇上咽喉作痛..雖有點掃興..但都提起精神收拾屋中雜物..決定繼續居住在現時單位..為了讓自己有個煥然一新的感覺..剛巧實惠有正嘢..就扑鎚買下新梳化..仲有附近運動舖又有折..決定買一張收腹板..日後就算偷懶唔去gym..返到家都可以稍作鍛鍊..亦希望俾自己一個做gym嘅推動..整裝待發去面對新的挑戰..

凍僵!

呢幾日寒流襲港..今晚攞完暖風機同羽絨 俾老豆之後..在屋企附近另一個屋園經過..見到香港寬頻有個營業員..夜晚八點幾竟然仲响條街度食西北風..希望佢千祈唔好冷病..唉! 衹能講句..搵食艱難..坐office嘅朋友們..係唔係唔應該咁隨便就抱怨自己嘅工作呢?!

Classic Moments

(網絡圖片) This new ad from LV timepiece brings me an inspiration, a new calling, an urge, to capture the moment of life, not only record of image, but also my feelings, my emotions, my perspectives, my appreciation of the surroundings, people, creatures, and more. I hope that some day I could have a decent gallery, a collection of my works, to share with people about my own footprints. 捕捉分秒瞬間..留住浮光掠影 Source:　　Tambour-LV277-Ben-Hill-Glamour-Boys-Inc.

土耳其 III - 熱氣球之旅

熱氣球之旅是其中最貴的一項自費活動..但本著人一世物一世的宗旨..始終都花了美金二百五十元..再加少少膽色..就上去個滕籃..由高空眺望"奇石林" (加柏都西亞 Cappadocia)..奇石在金黃陽光照射下..別有一番境景致.. 氣球亦比預期中更加穩定..有團友雖然畏高..但仍堅持乘坐氣球..他的勇氣都是值得的..因為這是一個很奇妙的旅程..各人都被周圍景觀吸引著..同時亦舉起相機..像迥轉壽司桌上的輸送帶..不斷輪流走位獵影唔同角度..投入得瘋了一樣!!

土耳其 II - 博斯普魯斯海峽

乘船暢遊博斯普魯斯海峽 (Bosphorus Cruise)..在晴空朗日下..可盡覽海峽兩旁的景色..奇妙之處在於..一邊是亞洲..而另一邊則是歐洲..咁大個仔..終於可以跟歐洲來個近距離接觸..欣賞一下海峽兩旁不同的建築物..不時經過的船舶..時在水中時在天空的水鳥..在涼涼海風中..除可飽覽歐亞兩邊海峽風光..亦彷彿正置身於兩個世界的交會處..非常寫意..

土耳其 I - 棉花堡

躺在棉花堡 (Pamukkale) 的白色岩石上, 享受土耳其的陽光, 此刻頓感心情安靜舒暢, 彷似置身於仙境中, 令人悠然忘我..

p.s. 由於步行棉花堡岩石範圍須要赤腳..徒步來回棉堡之時..腳底不斷被地上的沙石"按摩"..痛到甩肺..簡直想死!

Turkey's Trip

由伊斯坦堡飛往多哈，再由多哈機場呆等七個鐘轉機，今日下午安全抵港，為今次九日旅程畫上句號。帶回來的除了近三千張相，一些美好回憶，識了一班好nice的團友，還有三家姐想食的土耳其軟糖及十條精選絲巾，仲有一堆污糟衫褲同些少喉嚨痛！

　　 p.s. 祝各團友都生活愉快，身心康泰。

Sam Hui Live

有個buddy以前都唔係好聽流行曲..直情唔洗慌佢會睇演講會..直到歌神近年間歇性復出..竟然完完全全咁挑起咗佢舖癮..噚晚仲同埋佢地兩兄弟一齊去睇sam hui..今次其實都無乜特別嘅地方..相信歌神都係鈍以歌會友..今次亦係自紅館大執之後我首次去睇show..全晚較為感動嘅部份係歌迷即場執咪唱K及大合唱..特別鍾愛嘅係 "阿郎戀曲" 及 "鐵塔靈魂"..相信衹有阿Sam嘅歌先有哩種盈聚力..

生活..生存..生命..?

昨天見到一則新聞..睇完後心裡有點不舒服..一個男人在金鐘置地廣場..因涉嫌盜取他人財物..在被捕及調查過程中..懷疑因恐怕遭起訴..慌忙從三樓跳下地面..結果傷重不治..據報..他患有小兒痳痺症..一向是家中經濟支柱..失業後一直為生活掙扎..佢老婆更表示佢搵到錢都俾哂個仔..姑勿論佢嘅行為錯對..呢單料對我都有一d衝擊.. 作為一個要負責任的男人並不容易..就算自己唔食,,都要俾家人吃..社會上好似貧困嘅人就只會越來越窮..生活擔子會越來越沉重..現實中..一個男子應該要建立事業..保持競爭力..與時並進..同時要對家庭承擔..養妻活兒..一切種種..談何容易..人生就好似要跟時間角力..在社會互相競技..但又有誰可以保證甚麼..究竟一生何求 ?!

暫停食水

真黑仔..今晚屋企附近爆水管..攪到成個屋園無食水供應..樓下見到d街坊攞哂d水筒同埋煲出嚟..响水務處嘅水車攞食水..如果唔係都無水煮飯同沖涼..突然覺得我地一班住戶好似變咗災民..狼狽..無奈!

一種福氣

最近機緣巧合..跟個舊同事傾談分享有關事業問題..有幾個頗有趣嘅points: 一) 人要有得選擇才可以高貴 (呢句好鬼cute) 二) 人一定會老..但千祈唔好做老餅 (不肯與時並進..遲早會被淘汰 --- 絕對同意..古人都話..活到老學到老) 三) 面對乜嘢事都要好positive (這點我好似遺忘咗好耐了) 四) 自己要有個mandate..遇到低潮時..成為一股推動力 (有時都覺得自己欠缺目標夢想..只係一味咁好似掙扎求存..或者係覺得自己無乜條件去講呢樣嘢..又或者係唔敢去付出呱..) 响人生道路上..能有幸遇到一些高人前輩俾吓意見提點吓..都係一種福氣..希望我都可以去將呢福氣去分俾其他人.. (網絡圖片)

Bowling...Bowling!

晚上跟同事到南華會碌 lane..今晚自己的表現尚算ok..打了三個回合..指頭都有點痛..條腰都有點酸軟..今次玩嘅過程中都有些少啟發..每當準備打之時..都嘗試好 focus去放手甩個波出去..偶然發覺自己可能會 hold得太耐..以為咁就會好 d..但 timing耐咗就連個 momentum都會弱咗..直接影響表現同心理質素..有時都覺得自己做人做事..有d諗多咗..或者..有些經驗是需要自己去感受去體會的..當太理智去嘅話..就可能錯失體會過中滋味..無法去領悟更多..難以令自己再進步..相反..有時可能唔需要分析太多..及時感受一下個過程先至最重要..

IQ博士 & Friends

過去一個星期很攰..同時有幾個job要交功課..每晚都試圖帶嘢番屋企做..但係食完餐飯後就已經唔想再對住d 嘢..瞓又瞓唔好..第二朝又一早仆番公司..真係人都癲! 挨咗五日..終於等到今日放假..下晝去咗青衣城..响嗰度見到佢哋..好難得..因為平時好少遇到用呢套卡通做主題嘅function..咁好機會..當然要替佢哋影番 d 沙龍留念..